السلام عليكم و رحمه الله و بركاته على احلى منتدى
انا طبعا كل معلوماتى عن الكلاب من هنا فى المنتدى و كنت قرأت طبعا عن الدراى فود المنزلى و اكثر من عضو كان عامل موضوع بيتكلم فيه عن طريقه عمل الدراى فود المنزلى
انا برضه قرأت فى المواقع الاجنبيه عن طريقه عمله و وصلت لطريقه جمعت فيها من كل المواضيع و و استسهلت بصراحه كمان
طبعا اتشجعت و عملت التجربه و الحمد لله عجبت الدا الكلبه بتاعتى جدا و بقدمهالها وقت ما اكون مكسل اعملها اكل او لو مسافر و بخلى والدى يطلعهالها علشان ما اشغلش حد بأكلها او لو مفيش اكل عندى ينفعها يعنى مش بعتمد عليه الا فى الضروره بصراحه يعنى يومين او تلاته بالكتير فى الاسبوع
نيجى للطريقه
اولا المكونات:
1- دقيق ابيض 4 اكواب
2- شوفان 1 كوب
3- 1 معلقه خميره +1 معلقه سكر مذابين فى 1 كوب ماء دافىء
4-لبن 1 كوب
5- 1\3 كيلو لحم مفروم
6-ملح 1 معلقه
7-فنجان قهوه زيت
ثانيا الطريقه:
نضع الدقيق مع الشوفان مع اللحم المفروم و نقلب جيدا
نضع كوب الماء الفاتر المذاب به الخميره و السكر على الخليط (الدقيق و الشوفان و اللحم)
نضع كوب اللبن بالتدريج حتى نحصل على عجينه متماسكه و جدران الطبق اللى بنعجن فيه يكون نضيف تمام
نضع فنجان قهوه من الزيت على العجينه الملمومه و ندهنها كلها فى ايدينا نبقى ماسكين العجينه فى ايدينا و كلها واصلها الزيت من الجوانب و بعدين نحطها تانى فى طبق العجن و نسيبها مده ساعه و نصف للتخمر شتاءا و لو فى الصيف هنسيبها تتخمر مده لا تزيد عن ثلاثه ارباع من الساعه
و بعد ذلك نيجى لتقطيع العجينه كل واحد براحته يقطع على شكل صوابع او اشكال مربعه بس اهم حاجه السمك ما يزيدش عن 1 سم علشان تستوى كويس نسخن الفرن مسبقا على حراره 200 درجه لمده 5 دقائق قبل دخول العجين
و نحطها فى الفرن على حراره 200 درجه لمده ما بين 30 الى 45 دقيقه بنسبه متفاوته حسب السمك للعجين و كفاءه الفرن و طبعا بنبدأ نتابع بعد ال 25 دقيقه الاولى علشان تتأكد انه استوى و ما بيتحرقش او اتلسع
فى الاخر ان شاء الله هتلاقو دراى فود شكله جميل و اهم حاجه ان الكلاب تحبه
الكميه اللى بتطلع من الدراى فود حوالى كيلو و نصف او اقل حاجه بسيطه و اعتقد انها كميه معقوله جدا و القيمه الغذائيه كبيره جدا و اتكلفت حوالى 20 جنيه يعنى الكيلو متكلف اقل من 14 جنيه اعتقد معقول جدا
اتمنى اكون افدت و لو بجزء بسيط جد اى حد حابب يعمل ادراى فود للكب بتاعه و طبعا اى استفسار عن اى حاجه انا فى الخدمه و شكرا