السلام عليكم يا اخواني الكرام:
انا من محبي البادجي جدا بس لأن الإمكانات الماديه مش ولا بد معايا ولان خبراتي فيه محدوده متلاقيش عندي غير جوزين اتنين بس . لكن الحمد لله و اوجه كل الشكر للأستاذ احمد حلمي على الموقع المفيد جدا اللي اول لما شفتوا مصدقتش نفسي ان في حد مهتم و بفضل الله سبحانه و تعالي ثم الموقع للممتاز للأستاذ احمد بقى الموضوع مش مجرد عصفورين في البلكون بقت هوايه و الحمد لله . و اتمنى في يوم من الأيام ان شاء الله اقابلك يا استاذ احمد .
كان عندي عصفورين دكر و انثى لكن للأسف محصلش تزاوج فرحت فاصلهم فترة اربع خمس ايام و اشتريت اتنين تانيين و رحت حاطت مع كل واحد منهم اللي يناسبوا و هكذا و لاحظت ان الدكر بتاعي اشتغل مع الأنثى الجديده بس لسه برضو بتخاف مني جدا و هي على فكره انثى البينو
اما الأنثى الأصليه فكانت برضو رخمه و معملتش حاجه مع الدكر الجديد و بعد فترة حوالي اسبوع جيت ابص على القفص الصبح زي كل يوم ملقيتهاش و لقيت الدكر رغم اني قافل كل الأبواب بسلك نحاس متغطي(طبعا عشان التسمم) و كان الأنثى فص ملح و داب .
و صعب عليا الدكر خصوصا ان شكلوا طيب و ابن حلال و ابتديت احاول ادربه و ماستعنت بموقع الأستاذ احمد بس مكنش الموضوع ممكن لأن الموقع بادي من اول لما يكون عند العصفور حوالي تلت اسابيع و اضطريت استعين بالجهات الأجنبيه و فتحت مواقع كتيير جدا عن البادجي بالإنجليزي و الحمد لله مكنش صعب الموضوع لكن برضو معرفتش اتصرف بسبب قلت الخبره
اصلا انا كنت بمسك العصافير بجوانتي لني بقشعر من الريش لحد ما الحمد لله اتعودت و هكذا ... بدأت التدريب و محتاج فيه شويه مساعده
انا باخد العصفور ده كل يومين تقريبا في قفص صغير و اقعده جنب الكمبيوتر معايا (عندو تقريبا خمس او ست شهور) و بدخل ايدي في القفص و ابتدا يتعود يطلع على صباعي بالأمر يعني اطلع يطلع انزل ينزل و لما اندهلوا بأسمه يبص عليا (اسمه روي) بس المشكله انو مبيطلعش اي صوت خالص حتى لما يكون في البلكونه برضو .
و فكرت اني اجيبله انثى صغيره عشان تسليه بس مش عارف ده هيأثر على عمليه التدريب ولا لأ ... و على فكره هو بقالو حوال اسبوع في القفص لوحدو ..
ارجو الإفاده رغم الإطاله
و السلام عليكم و رحمة الله و بركاته